Ruan Josh is terug met ’n splinternuwe vollengte album, Wysers. Dit sewe jaar na die uitreiking van sy debuut-album, Eggo.
Die vrystelling van Wysers is ’n besonderse mylpaal in sy musiekloopbaan. Wysers is ’n samestelling van 13 liedjies wat ’n dieper insig gee na Ruan Josh se lewe en menswees.
Sy fokus vir die album was dat elke liriek en melodie van elke liedjie ’n storie moet vertel en deel. Die album is ’n samevloeiing van verskeie genres van sokkie en country tot rock en pop.
LEES OOK: Covid-19 verliese inspireer Ruan Josh se nuwe vrystelling
Die album sluit treffers in soos die enkelsnitte Ligte Af, Ek Sukkel en die duet met Franja du Plessis, Net Hier Bly. Hy bederf ook weer met ’n paar dieper en emosionele liedjies soos Provider, Vat Die Houe en Dear God. Aanhangers kan beslis ook ’n verrassing of twee op die album verwag.
Wysers sal op 29 Maart op digitale platforms beskikbaar wees. Die musiekvideo vir Dear God is reeds Sondag uitgereik as ’n voorsmakie vir die album. Daar is wel ook fisiese CD’s beskikbaar vir diegene wat die sentiment van ’n harde kopie waardeer.
Kyk die musiekvideo vir Dear God hier:
“Ek sien uit na die reaksie van gehore en is veral opgewonde om hulle terugvoer op die musiek te hoor. Ek glo dat musiek ’n manier is om ’n band met my ondersteuners te bou en hulle te inspireer om die lewe ten volle te geniet,” vertel Ruan.
Buiten die nuwe album is Ruan Josh ook vanjaar weer op toer saam met Franja du Plessis. Hul eerste optredes saam in meer as twee jaar. Hulle toer ondermeer deur die mooie Suid-Afrika en ook na Namibië.
Enkele statistieke van Ruan:
- Sy debuutalbum Eggo (2017) het Goue Status bereik met verkope van meer as 15 000 eenhede in 2023.
- Provider is al meer as 3 miljoen keer gestroom en gekyk.
- Voor die vrystelling van die album het Wysers al meer as 6.4 miljoen strome en kyke ontvang met die enkelsnitte en musiekvideo’s reeds uitegreik, wat dit halfpad na Goue Status bring voor die volle vrystelling op 29 Maart.