FOTO: Verskaf
Voor die vrystelling van hul 9de album, bederf Spoegwolf aanhangers vandag met die eerste enkelsnit vanaf die album, getiteld Bring My Geweer. Hul nuwe album, Droombrief word in die nabye toekoms vrygestel.
Bring My Geweer is in 2022 geskryf en is geïnspireer deur ’n mengsel van persoonlike gevoelens en fiksie. Die storielyn van die enkelsnit draai rondom ’n ou man op sy sterfbed, en aanhangers kan uitsien na ’n donker, vinnige, dog ligte en stadige aanbieding van die groep. Die enkelsnit, soos die album, is weereens deur die groep self en Jurgen Von Wechmar by Sunset Recording Studios vervaardig.
“Donkerte is iets wat ons almal in ons het. Ons het daarin geslaag om dit terug te hou, tot nou toe. Nadat ons sopas ’n dekade van Spoegwolf gevier het, het ons nou die selfvertroue om meer onsself te wees,” sê Danie.
Die enkelsnit is gekies as die eerste aanbieding vanaf die nuwe album omdat dit die liedjie is wat die beste al die temas op die nuwe album weerspieël. Dit bevat al die elemente wat die groep graag in hul musiek gebruik – harmonieë, donker stories, groot kitare en ware musiek.
“Ons hoop dat mense identifiseer met ons strewe na regte musiek en regte kuns, en hulle kan uitsien na ’n nuwe en verbeterde Spoegwolf.”
Die musiekvideo vir die enkelsnit is deur Hugo Brand geskiet en sien hoe die groep in ’n groot vertrek lekker kuier en harde musiek maak. “Dit wys jou wie ons is. Na 10 jaar is daar nie veel oor nie. Net musiek.”
Kyk die musiekvideo hier:
- Spoegwolf se nuwe album, Droombrief word op Woensdag, 23 Maart uitgereik. Aanhangers kan die album vanaf vandag – Dinsdag, 22 Maart 2022 vooraf stoor.