FOTO: Andre Badenhorst
Op Die Heuwels Fantasties se agste ateljee album, Volume, sien ’n mens hoe hierdie konstante innoverende groep, hulle negentigs invloede in die huidige digitale- stroom- era inspan.
Volume, wat op Vrydag 22 Oktober uitgereik word, spog met ’n eklektiese mengsel van akoestiese treffers, pop-punk, synth-ballades en so ’n bietjie electro-folk vir ’n uitsonderlike audio umami.
Hunter Kennedy vertel dat hy uit sy nate is oor die uitreiking van die nuwe album: “Dit is ons derde een sedert die pestilensie en ek dink dit het in ons guns getel om geolie te bly. Pierre het ’n great job gedoen met die skryf van Eggo en die samewerking met Spoegwolf het dit natuurlik tot ’n volgende vlak geneem. Ek hou ook baie van Werk Vir ’n Lewe se energie. Ons het dit ontgun daar waar Blink-182 die wortels begrawe het. Ek sou sê die album as geheel is ’n kombinasie tussen die volwassenheid van Herverbeel en die dringendheid van 2021. Volume II is ook al amper klaar en dit maak my nog meer opgewonde. Ons het baie nuwe musiek om te deel!”
Fred den Hartog voeg by: “Met Volume het ons die saksofoon, kitaar, klavier, perkussie en stemme op ’n ander manier benader. Ons het alles stuk-stuk opgeneem om uiteindelik by ’n plek te kom wat vars, uniek en steeds ‘Heuwels’ is, as dit sin maak. Ek hoop almal hoor en voel ons deur hierdie paar songs te luister.”
Die eerste enkelsnit vanaf die nuwe album Eggo is ’n karige ballade vir onseker tye. Die subtiele klavier en tjello skep asemhalingsruimte vir Pierre (Die Heuwels Fantasties) en Danie (Spoegwolf) om hul aparte kwesbaarhede te emotiveer. Die lied se crescendo is ’n katarsiese samekoms van twee generasies van alternatiewe Afrikaner. Eggo is reeds vanaf 15 Oktober op alle digitale platforms beskikbaar.
Snitte op die album:
Hoor Jy My
Werk Vir ‘n Lewe
Eggo – met Spoegwolf
Okay, fine
Hardloop Weg 2.0
Days Are Dark
Goeiemore Suid Afrika
Bellville
VOLUME BY DIE FORT

- Die Heuwels Fantasties, Early B, Coenie de Villiers en Refentse.
- Sondag, 31 Oktober by Fort Schanskop by die Voortrekker Monument.
Die Heuwels Fantasties stel die Volume album met behulp van hul vriende Early B, Coenie De Villiers en Refentse bekend! In samewerking met Jack Daniels en Marras. Pierre Greeff sê: “Ek kan nie wag om saam met ons tjommies weer iets in Pretoria te doen op ’n skaal wat ons nie kon in 500 dae nie. Volume by die Fort om Volume die wêreld in te stuur!”
10:00 Hekke maak oop
11:00 Boek Klub
12:15 Refentse
13:30 Coenie de Villiers
14:45 Early B
16:00 Die Heuwels Fantasties
Pak ’n piekniek mandjie en kom kuier saam, gaste is welkom om ’n sambreel, kampstoel of kombers te bring. Geen eie alkohol, daar is ’n kroeg en kosstalletjies op die perseel. Vir meer inligting en kaartjies besoek die Facebook-event of gaan na http://www.bydiefort.co.za.
