Fantasiewêreld van musiekblyspele binne bereik met André Schwartz en Leah

FOTO: Verskaf

Wanneer André Schwartz en Leah se stemme een word in hul aanlynproduksie, Musical Magicals, op Sondag, 27  September, sal kykers meegesleur word na die fantasiewêreld van die grootste musiekblyspele soos hul bekroonde  treffers vertolk.  

“Toe ek en André hierdie vertoning beplan het, het ek sommer nostalgies geraak oor al die wonderlike oomblikke wat  musiekblyspele al gelewer het. Dit plaas mens sommer in ’n ander wêreld en laat jou so bietjie vergeet van tyd,” het die  talentvolle Leah vertel. 

Gedurende dié vertoning maak hul liedjies vanuit musiekblyspele soos Mamma Mia!, Chicago, Phantom of the Opera,  Aladdin, Moulin Rouge, Les Misérables, Wizard of Oz en vele meer hul eie.  

“Dis my derde aanlynvertoning en met elke konsert streef ek daarna om vir die kykers ’n unieke produksie te bied wat  regtig anders is as die gewone,” het André gesê. 

André het ook al ’n blywende indruk as musiekteater-kunstenaar gemaak en dié begaafde sanger het onder meer verskeie  toekennings vir sy optrede as “The Phantom” in The Phantom of the Opera ontvang. Hy is ook al deur die meester Andrew  Lloyd Webber self erken as een van die beste “Phantoms” wat die verhoog al ooit opgelewer het. 

“Dis vir my ’n groot voorreg om hierdie produksie saam met André te kan doen – veral omdat hy reeds so gesout is in die  musiekblyspel genre,” het Leah gesê. 

Magical Musicals vind op Sondag, 27 September om 17:00 aanlyn plaas en is ongeveer ’n uur lank. Kaartjies is reeds  beskikbaar teen R65 – slegs by Quicket hier. Dié produksie word in samewerking met CO Productions aangebied.