Joe Foster en Johan C Venter span saam vir ‘gay-gemeenskap’

FOTO: Verskaf

Ná die reuse sukses van Joe Foster en Johan C Venter se eerste duet Hoe Moes Ek Weet doen hulle dit weer met hulle splinternuwe samewerking, Voel My Pols.

Dié enkelsnit gaan luisteraars nie net diep raak nie, maar ook daaraan herinner om weer deernis en liefde bo verdeling en veroordeling te kies. Hierdie is Joe se derde enkelsnitvrystelling vanaf sy jongste album Volgende Stap, wat aanlyn en in Musica-winkels beskikbaar is. Joe wag al drie jaar om hierdie snit vry te stel.

LEES OOK ONS ALBUM-RESENSIE HIER

En nóú is die regte tyd. “Ons almal verskil, maar ons almal se harte klop dieselfde, ons almal het dieselfde basiese wense om gelukkig te wees. Om iewers in te pas en aanvaar te word deur onsself en die gemeenskap, is seker een van die grootste. Dis hoe ons gemaak is. Nie eers gepraat van die feit dat ons nie gemaak is om alleen te wees nie. Ons is ook gemaak om een te wees as gemeenskap. Dis waar ons ware krag lê en dis waaroor hierdie liedjie gaan,” verduidelik Joe.

Dit is ook die belangrike boodskap agter hierdie treffende liedjie. Voel My Pols is oorspronklik geskryf en gesing deur die Amerikaanse sanger-liedjieskrywers Eli Lieb en Brandon Skeie. Hulle het die liedjie geskryf na die afgryslike tereuraanval op Pulse, ’n gayklub in Orlando, Florida op 12 Junie 2016, waar ’n terroris 49 mense dood geskiet het en 53 beseer het. Dit was naas 1949 en voor die 2017 se Las Vegas skiet-voorval een van die grootste menseslagtings in Amerika se geskiedenis nog ooit.

Hierdie snit was geskryf om genesing te bied vir die gay gemeenskap in Amerika, maar die voorval het die hele wêreld se gay gemeenskap geruk en geraak. Dit was die kersie op die koek vir die diep seer en verwerping wat reeds rondom die onderwerp gehang het reg oor die wêreld.

Joe Foster en Johan C Venter was net so getref soos talle ander Suid Afrikaanse mense en het in daardie tyd op hierdie snit af gekom. Hy en sy skryf- en singmaat Johan C Venter het op daardie stadium net Hoe Moes Ek Weet vry gestel en nie eers geskroom om die Afrikaanse aanpassing van hierdie liedjie te skryf en op te neem nie. Eli Lieb en al die ander skrywers het dit persoonlik gehoor en gesê hulle kan hoor die aanpassing in Afrikaans en hoe Joe en Johan dit vertolk het kom reg uit hulle harte en dat hulle die oorspronklike gevoel vasgevang het en die liedjie regverdig het.

Kyk die musiekvideo hier:



Vandag op 12 Junie drie jaar gelede het hierdie donker voorval gebeur in Orlando, FLorida op onskuldige mense en Joe Foster en Johan C Venter het besluit om ter nagedagtenis van al hierdie slagoffers en die hele gay gemeenskap van die wêreld in die middel van internasionale LGBT bewustheidsmaand hierdie snit uiteindelik vry te stel. Hulle wil ’n verskil maak.

“Dit is my liefdadigheid,” sê Joe “Ek wil ons mense bind waar verdeling en verwerping in geslag en seksuele oriëntasie ons jeug en gemeenskap in ’n baie kwesbare posisie plaas.” Joe en Johan voel sterk dat dit tyd is dat ons die saak onder die lig begin bring en ophou dit wegsteek soos vuil wasgoed. Daar is niks vuil aan liefde nie. Veral nie as dit deur soveel seer moes gaan nie. “Voel my Pols want dit klop net soos joune.” Dis die boodskap van hierdie liedjie. Eenheid is krag. Deernis is liefde.