Atlantiseers vier Ghoema-benoeming met ’n nuwe enkelsnit

Adrio, die voorsanger van Atlantiseers. FOTO: Verskaf

Atlantiseers, die Afrikaanse Indie-groep van Johannesburg, het 2019 op ’n hoë noot afgeskop met ’n Ghoema-benoeming vir hulle debuutalbum, Verhoudingspolitiek. Dié album is in die kategorie Beste Alternatiewe Album benoem, ’n wonderlike deurbraak vir die nunwelinge.

Kort op die hakke van hierdie prestasie is hulle terug met ’n nuwe enkelsnit getiteld Ek Weet.

Sanger en liedjieskrywer Adrio van der Walt, Atlantiseers se voorman, sê dat Ek Weet oor die einde van ’n verhouding gaan. “Die hele album is gebou rondom die verloop van ’n enkele verhouding. Die album skop af aan die begin van ’n wonderlike nuwe liefde, en in Ek Weet tel ons die storie op in die eerste weke nadat die verhouding tot ’n einde kom. Ander snitte ondersoek weer verskillende  fases van die aanvaarding daarvan. Dit gaan van smeek en rou na bitterheid en woede, maar ná ’n lang proses is daar teen die einde aanvaarding, soos wat deur die laaste liedjie op die album weerspieël word,” verduidelik hy.

In Ek Weet, gaan die luisteraar saam met die protagonis deur een van die mees traumatiese oomblikke nadat ’n breakup: wanneer jy jou eks vir die eerste keer saam met hul nuwe geliefde sien. “Ek dink ons almal is al deur dit: jy stap verby ’n restaurant en daar sit jou eks, en lyk só gelukkig met die nuwe persoon in hul lewe,” sê Adrio.

Ek Weet vang die gekompliserde gemengde gevoelens van daardie oomblik vas. “Mens voel pyn, maar terselfdetyd wonder jy of jou ek’s beter af is by die nuwe persoon, of hulle dalk meer het om te bied, op watter vlak ook al. En tog is jy ook oortuig dat hulle nooit sal ervaar wat julle saam gehad het nie, en nooit kan namaak wat julle so besonders gemaak het nie,” voeg hy by.

Kyk die musiekvideo hier:

Verhoudingspolitiek is een van baie min Afrikaanse vrystellings is wat op hierdie genuanseerde manier oor verhoudings praat.  Populêre Afrikaanse liedjies is geneig om op die lekker kant van liefde te fokus, waar albei partye nog erg verlief is. Op hierdie album word die hele spektrum van ervaring aangespreek, en die verskillende fases van die einde van ’n verhouding behoorlik uitgepluis.

“Ons is baie trots op wat ons aangepak het, en weet dat baie mense daarby aanklank gaan vind. As jy al seergekry het deur ’n liefdesverhouding – en wie het nie!? – is Verhoudingspolitiek en Ek Weet net vir jou,” sluit hy af.

Ek Weet is nóú op alle digitale musiekplatforms beskikbaar.