Tweede snit van Geraldine een om nie te ‘mis’ nie

Fotograaf: Jacques du Preez

Geraldine Scholtz het geen bekendstelling meer nodig nie. Haar eerste enkelsnit, Sommer, ’n popliedjie uit die pen van die bekroonde skrywer Johan Oberholzer, is gedurende Augustus 2017 uitgereik en het vir meer as sewe maande bo-aan die trefferperades van talle radiostasies landwyd gepryk.   

Die musiekvideo vir hierdie liedjie was ook vir byna sewe weke op die kykNET Top 20 se ranglys en het sy beslis met die intrapslag gewys waarom Suid-Afrikaanse luisteraars en gehore gaande is oor haar.

Hierdie blonde, blou oog talent van die Laeveld het groot drome en gryp elke goeie geleentheid wat haar pad langs kom aan met dankbaarheid. Geraldine se musiek is baie eerlik en sy deel graag haar hart met luisteraars. Sy streef daarna om iets vars na die mark te bring, waarna alle ouderdromsgroepe kan luister en geniet. Haar splinternuwe enkelsnit, Mis, uit die pen van Johan Oberholzer en vervaardig deur Robin Kielly, word hierdie week op radiostasies landwyd uitgereik.



“Die liedjie gaan oor ’n mens se eerste liefde en die impak daarvan. Dit gaan oor die eerste ontmoeting met liefde en hoe mooi dit kan wees. Soms ‘mis’ ’n mens die gevoel van jou eerste liefde, maar soms moet jy val voordat jy werklik kan vlieg,” sê Geraldine.

Johan Oberholzer sê op sy beurt: “Na die sukses van Sommer, het ons almal besef dat ons besig is met ’n kompeterende kunstenaar en dat die opvolg enkelsnit nog ’n deel van haar veelsydigheid moet wys. So is Mis gebore – ’n sterk ballade oor verlies en eerste liefde wat altyd ’n blywende impak maak.”

Die deurwinterde en geniale vervaardiger, Robin Kielly praat met lof van Geraldine. “Dit was vir my heerlik om saam met Geraldine te werk. Sy is ongelooflik toegewyd om haar beste te gee en het positief gebly ten spyte van al die uitdagende versoeke wat ek aan haar gerig het in die ateljee. Sy is jonk, maar baie volwasse in haar houding en uitkyk op die lewe en dit is verfrissend! Ek wens haar net die beste toe!”

Luister hier na ’n voorskou:

Geraldine is ook vanjaar by Innibos te sien met ses vertonings wat jy sommer nie wil mis nie!

Geraldine glo vas dat musiek ’n kunswerk is, wat die hart deur middel van die ore raak, en dit is ook wat sy graag met haar liedjies en loopbaan wil bereik.   

Hierdie enkelsnit is een wat jy nie wil ‘mis’ nie!